28 Shk Plani i Veprimit për Zbatimin e Aktgjykimit X kundër Maqedonisë së Veriut

Këshilli i Europës (Departamenti i Orientimit Seksual dhe Njësia e Identitetit Gjinor – SOGI me pjesëmarrjen e Departamentit të Ekzekutimit) në bashkëpunim me Ministrinë e Drejtësisë së Maqedonisë së Veriut dhe Ministrinë për Çështje Europiane dhe Drejtoratin për Barazi dhe të Drejtat e Njeriut organizuan një vizitë studimore kolegiale në Maltë në mënyrë që të ofrojnë një përmbledhje të detajuar të Ligjit për Identitetin Gjinor, Shprehjen Gjinore dhe Karakteristikat e Seksit. Vizita studimore ishte pjesë e planit të autoriteteve të Maqedonisë së Veriut për të zbatuar vendimin e Gjykatës Europiane të vitit 2019 në rastin X kundër ish-Republikës Jugosllave të Maqedonisë dhe që do të shqyrtohet nga Komiteti i Ministrave gjatë mbledhjes për të Drejtat e Njeriut që do të mbahet më 3-5 mars.

Rasti X (kërkesa nr. 29683/16, 17.01.2019) ka të bëjë me shkelje të së drejtës së kërkuesit për respektimin e jetës private për shkak të  refuzimit të autoriteteve administrative për ndryshimin e gjinisë/seksit të kërkuesit në rubrikën e certifikatëss ë lindjes që nga viti 2011 (shkelje e Nenit 8).  Gjykata Europiane vlerësoi se “korniza aktuale ligjore në Shtetin e paditur nuk siguron ‘procedura të shpejta, transparente dhe të qasshme’ për ndryshimin e seksit të transgjinorëve në certifikatën e lindjes ”  që ka të bëjë me njohjen ligjore të gjinisë.

Vizita studimore u dha mundësi pjesëmarrësve të delegacionit të Maqedonisë së Veriut  të njihen me legjislacionin e identitetit gjinor të Maltës, duke pasur parasysh se Malta kishte një problem juridik identik në legjislacionin e saj të mëhershëm. Më saktësisht, rasti Cassar kundër Maltës (kërkesa nr. 36982/11) përfundoi me zgjidhje miqësore, pasi Shteti i Maltës mori përsipër të miratojë një zgjidhje ligjore dhe të lejojë personat transgjinorë të ndryshojnë plotësisht gjininë e tyre në regjistrat zyrtarë, pasi zgjidhja e mëparshme ligjore nuk lejonte regjistrimin e ndryshimit të gjinisë për të gjitha qëllimet, si për qëllimet e martesës, që ishte një problem i veçantë në rastin Cassar kundër Maltës. Si pasojë, Malta miratoi Ligjin e ri të Identitetit Gjinor, Shprehjes Gjinore dhe Karakteristikave të Seksit në vitin 2015. Ai konsiderohet të jetë një nga ligjet e para jashtëzakonisht të avancuara që mbrojnë personat transgjinorë në të gjitha sferat e jetës. 

Vizita studimore e delegacionit nga Maqedonia e Veriut dhe njohja e tyre me praktikat dhe legjislacionin më të mirë të Maltës në kontekstin e përpjekjeve për të zvogëluar diskriminimin bazuar në identitetin gjinor, do të lehtësojë përgatitjen dhe zbatimin e zgjidhjeve ligjore në përputhje me Konventën.

Lexoni Planin e Veprimit në rastin X këtu: http://hudoc.exec.coe.int/eng?i=DH-DD(2020)47E

Referencat nga faqja zyrtare e Këshillit të Europës